Брод на институтот Ocean Voyages вчера се врати во пристаништето во Хонолулу со 103 тони ѓубре извлечено од Тихиот Океан во една експедиција.
Ова е најголемата количина ѓубре собрана од океанското дно во една експедиција, па тоа значи дека тимот во експедицијата што траеше 48 дена постави еден навистина тажен рекорд за човештвото. Водачот на експедицијата, Мери Кроули, која исто така е основач и извршен директор на институтот Ocean Voyages, рече дека за неколку дена се враќаат назад за да соберат уште ѓубре. Таа нагласува дека реализацијата на овие експедиции зависи од донации.
„Многу сум горда на нашиот трудољубив екипаж. Ја надминавме зацртаната цел од 100 тони фрлена пластика и рибарски мрежи. Во овие тешки времиња исполнети со предизвици продолжуваме да помагаме кон остварување на целта – океанот повторно да биде здрав, бидејќи од тоа зависи нашето здравје и здравјето на целата планета“, рече Кроули.
„Користиме проверена наутичка опрема за ефикасно чистење на океаните, а истовремено воведуваме иновативни нови технологии. Институтот Ocean Voyages е водечка институција во истражување и чистење на океаните со децении наназад“, додаде таа.
Од институтот планираат да ја прошират својата работа и во други делови на светот за да извлечат што е можно повеќе отпад од светските мориња и океани, отпад кој се заканува на опстанокот на морскиот свет.