Со елиминацијата на Вардар од Купот на Македонија згасна надежта на вардаровите навивачи дека ќе се израдуваат на двојна титула, на што чекаат дури од 1995 година.
Вардар уште од пред почетокот на сезоната не ги криеше амбициите за двојна титула - освојување на лигата и купот. Во лигата е прв со 6 бодови предност пред Шкендија и 9 пред Струга, па иако е далеку од готово, сепак сите веќе го гледаат како шампион.
За Купот на Македонија важи непишаното правило дека е многу полесно да се освои, бидејќи има многу помалку натпревари, само 6, но затоа пак еден кикс и отиде сезоната. Токму тој еден кикс го чинеше Вардар крај на сонот за двојна титула. Второлигашот Охрид Лихнидос во вторникот изваде 1:1 во Скопје и на пенали беше поуспешен.
За сезонава да има освојувач на двојна титула треба прво Вардар да не биде шампион на првата лига, што тешко дека ќе се случи. Треба лигата да ја освои Силекс или некој од Шкендија или Струга, кои допрва треба да го одиграат своето четвртфинале и да го дадат последниот полуфиналист.
Прв двојна титула освоил, се разбира, Вардар, и тоа во првата сезона по осамостојувањето - 1992/1993. Истиот успех го повторил во третата сезона 1994/1995, но оттогаш иако освоил уште 9 лигашки и уште 4 куп титули, никогаш не ги споил во иста сезона. Добар дел од сегашните вардарови навивачи, оние вистинските што одат на стадион, не биле родени кога последен пат се славела двојна титула. Не е чудо што во редовите на „Црвено-црните“ со душа се чека повторување за ваквиот успех.
Втор кому вакво нешто му пошло од рака е Силекс, кој двојна титула освоил во сезоната 1996/1997.
Потоа во престижниот клуб на двојни освојувачи влегла и Слога Југомагнат со триумфот во сезоната 1999/2000.
Дури 8 години поминале пред некој друг да освои двојна титула. Првата деценија од новиот милениум ја одбележа Работнички, кој жареше и палеше низ републиката. Двојна титула прво освои во сезоната 2007/2008, а потоа истото го повтори со триумфите во 2013/2014.
Последниот двоен освојувач е тетовска Шкендија со двојната титула во сезоната 2017/2018.
Оттогаш веројатно осма година Македонија нема да има освојувач на двојна титула.
Сумирано, ваков успех им пошол од рака на 5 екипи, а само Вардар и Работнички успеале по вторпат да го повторат тој подвиг.
Вардар - 2 (1992/1993, 1994/1995)
Работнички - 2 (2007/2008, 2013/2014)
Силекс - 1 (1996/1997)
Слога Југомагнат - 1 (1999/2000)
Шкендија - 1 (2017/2018)
Има неколку екипи на кои за малку им избегала двојната титула.
Слога Југомагнат дури во два наврата била на чекор од ваков успех, но двапати губела во куп финалето: во 1998/1999 2:0 од Вардар и во 2000/2001 2:1 од Пелистер.
Прилепска Победа можела да влезе во ова реномирано друштво во сезоната 2006/2007, но загубила во куп финалето со 2:1 од Вардар.
И Македонија ЃП пропуштила ваква шанса кога во сезоната 2008/2009 на пенали била поразена во куп финалето од Работнички.
Најсвеж пример е екипата на Струга. Во сезоната 2022/2023 ја освои лигата и беше на праг на двојна титула, но нејзините фудбалери катастрофално ги изведуваа пеналите во куп финалето кога Македонија ЃП победи со многу необичен резултат за пенал-рулет - само 2:0.
Се важи ли двојна титула ако едната титула е освоена како шампион на втората лига?
Вакво нешто може да се случи сезонава во македонскиот фудбал. Имено, две второлигашки екипи се во полуфиналето од купот, и тоа не било кои туку двете што се борат за првото место во втората лига - Охрид Лихнидос и Шкендија 77 од Арачиново. А, бидејќи во полуфиналето не играат еден против друг, во теорија можат да се сретнат во големото финале.
Охрид Лихнидос ќе игра против Силекс, додека Шкендија 77 против победникот од четвртфиналниот меч Струга - Шкендија, кој е закажан за 18 март.
Сѐ е во игра, па дури и вакво неверојатно сценарио - второлигаш да освои двојна титула, ако се рачуна, нели.
Никогаш не случило во претходните 33 сезони Купот на Македонија да го освои второлигаш. Всушност, само едаш второлигаш успеал да стигне до големото финале. Тоа беше Силекс во сезоната 2021/2022 кога го загуби финалето со 4:3 на пенали од Македонија ЃП, а ја освои втората лига (група Запад, тогаш се играше во две групи).
Статистички не се рачуна, но технички Тетекс беше веќе второлигаш кога ја освои куп титулата во сезоната 2012/2013. Тетовчани тогаш веќе беа испаднати од првата лига кога истрчаа во големото финале и успеаја да го освојат, па дури и играа во Европа како второлигаши.
Имало претходно примери кога второлигаш доаѓал на чекор, но полуфиналето секогаш се покажувало како преголем залак, освен во гореспоменатиот случај на Силекс. Дури и сегашните полуфиналисти Охрид Лихнидос и Шкендија 77 не се првпат во оваа фаза - двата во 90-тите имаат стигнато до полуфиналето, каде биле елиминирани.
Брегалница беше полуфиналист во пандемската 2020 година, кога сезоната се прекина и никогаш не се доигра. Останува засекогаш пропуштената шанса на штипјани како второлигаши да стигнат до финалето и евентуално да го освојат. Но, тоа е нешто за кое никогаш нема да дознаеме што би се случило.
