Манчестер Јунајтед доживеа дебакл во градското дерби против Манчестер Сити, а многумина се прашуваа зошто Кристијано Роналдо преседа на клупата за резерви и не влезе во игра.
Тренерот на „Црвените ѓаволи“ откри зошто португалската ѕвезда синоќа не одигра ниту минута, а неговиот тим се мачеше 90 минути.
„Нашиот настап беше неприфатлив. Навистина не очекував вакво нешто, ниту можев да си замислам. Во претходните натпревари нашата екипа покажа напредок, добра атмосфера и залагање. Нажалост, сега ништо од тоа не пренесоа на терен. Кога играте против играчи од топ класа, какви што има Манчестер Сити, морате да го дадете максимумот. Ние тоа не го покажавме, што е неприфатливо. Не сакав во игра да го ставам Роналдо од почит кон него и неговата голема кариера“, изјави Тен Хаг откривајќи зошто Роналдо синоќа не одигра ни минута.
Тој почна од клупата, а бидејќи уште по првите 45 минути Сити направи огромна предност водејќи со 4:0 со головите на Фил Фоден во 8. минута, Ерлинг Холанд во 34. и 37. и повторно Фоден во 44. минута, Роналдо сепак до крај остана на клупата. Во 56. минута Бразилецот Антони за момент ја врати надежта на Јунајтед, но потоа повторно на сцена стапија Холанд и Фоден (64. и 73.) за високи 6:1, а Антони Марсиал при самиот крај во 84. минута и првата од надополнувањето се погрижи за поблаг пораз од 6:3.
Сити е втор на табелата со 20 бода и еден бод заостанување зад лидерот Арсенал, додека Јунајтед падна на 6. место со 12 бодови.
