Најдобрите светски тенисери моментално се во Катар, каде ќе се натпреваруваат на АТП 500 турнирот во Доха, а по тој повод добија можност да се претстават и да откријат што можат да кажат на арапски јазик.
Најголема ѕвезда на турнирот во Доха ќе биде Новак Ѓоковиќ, кој успешно се опорави од повредата. Српскиот тенисер се здоби со повреда на Австралија опен, но успеа да се врати по само еден месец.
Ѓоковиќ по пристигнувањето во Доха успеа да приреди шоу заедно со колегите од тениската елита. Организаторите им дадоа можност на тенисерите да се претстават со зборовите што ги знаат на арапски.
Покрај Ѓоковиќ, во арапска облека беа облечени и Карлос Алкарас, Григор Димитров и Стефанос Циципас, а четворицата се обидоа да кажат по некој збор на арапски.
Секако, Ѓоковиќ беше најголемиот хит и успеа најмногу зборови да каже на арапски.
„Мерхаба, иншалах, алхамдулилах“, беа зборовите на Ѓоковиќ кои предизвикаа воодушевување кај арапските фанови во коментарите на социјалните мрежи.
Инаку, Ѓоковиќ е познат по тоа што се претставува на локалниот јазик каде и да се појави на турнирите. Така се здоби со симпатии од навивачи од Кина до Италија.
Ѓоковиќ зборува англиски, шпански, германски, италијански, француски и руски, а повремено покажува и познавање од кинески.
