Tesla прифаќа резервации од клиенти за својот електричен камионет од ноември 2019 година.
За година и пол откако беше претставен во јавноста, Cybertruck привлече 1.084.200 потенцијални купувачи.
Имено, толку многу луѓе досега изразија желба да станат сопственици на футуристичкиот електричен камионет, а кога велиме „потенцијални“, тоа значи дека овие резервации не се обврзувачки и вклучуваат навистина мал депозит од само 100 американски долари, па многу купувачи може да го изгубат трпението и да се откажат од набавката.
Според teslarati.com, повеќето луѓе (48%) се заинтересирани за верзијата со два електромотори и погон на сите тркала.
За оваа верзија се вели дека има опсег на возење од над 480 километри и дека забрзува од место до 100 километри на час за помалку од 5 секунди, а ќе чини 49.990 долари.
Втора најпопуларна опција е Cybertruck со три електромотори (44,5% од резервациите), додека на третото место е верзијата со еден мотор и погон на задните тркала, со само 7,5%.
Една од причините за толку мал интерес за моделот што работи со еден електричен мотор лежи во фактот дека оваа верзија пристигнува дури на крајот на 2022 година, една година откако ќе почне производството на другите варијанти.
Cybertruck доби сериозна конкуренција со претставувањето на електричниот Ford F-150 Lightning, кој привлече 20.000 потенцијални клиенти за само 12 часа.