Додека другите производители на автомобили забележаа пад на производството и продажбата во 2020 година, Tesla зад себе ја остави најдобрата година во историјата.
Се чини дека апелите на Илон Маск и трудот на вработените во Tesla вродија со плод, со оглед на тоа што, според прелиминарните податоци, американскиот производител им испорачал на клиентите 499.550 возила во 2020 година.
Точно, тоа е за 450 автомобили помалку од целта што ја постави првиот човек на Tesla на почетокот на минатата година, но тоа сепак претставува нов рекорд на компанијата на годишно ниво.
Меѓутоа, ако се земе предвид бројот на произведени автомобили во 2020 година, работниците на Tesla ја надминаа нормата, бидејќи во изминатите 12 месеци дури 509.737 возила излегоа од фабричките ленти.
Во последните месеци, Маск ги охрабри вработените во неговата компанија да направат сѐ што е во нивна моќ да ја завршат годината со испорачани половина милион автомобили.
И навистина, последниот квартал од 2020 година донесе историски рекорд на компанијата со произведени 179.757 возила и испорачани 180.570 автомобили.
Таков добар резултат беше постигнат најмногу благодарение на подостапните модели 3 и Y. Во 2020 година, направени се вкупно 454.932 примероци од овие два модела, а 442.511 возила им беа доставени на клиентите.
Во истиот период, 54.802 примероци од поскапите модели S и X излегоа од фабриката, додека 57.039 од овие автомобили пристигнаа на адресите на клиенти.
Ваквиот успех на Маск и Tesla сепак има скапа цена, а тоа е (не)задоволството на клиентите. Брзајќи да ги оствари зацртаните цели, компанијата испорача многу возила со недостатоци и недовршени елементи, што ги фрустрира купувачите и може да „му се удри од глава“ на Маск.
