Белоруската опозиционерка изјави дека Лукашенко ќе биде безбеден, но само доколку се повлече мирно и без инциденти.
Кандидатката за претседател на Белорусија моментално се наоѓа во егзил во Литванија каде избега плашејќи се за својот живот откако ги загуби изборите од вечниот Алјаксандр Лукашенко.
Говорејќи за украинскиот политички медиум Лівобережна, Светлана Тихановскаја беше запрашана дали Лукашенко ќе биде безбеден во земјата доколку дојде смена на владеачкиот режим.
„За сето тоа се преговара. Се разбира, доколку замине мирно и без инциденти, многу веројатно е дека ќе биде безбеден“, рече таа.
Воедно, таа проговори и за тоа како би изгледал нејзиниот состав на Владата. Провизорната Влада на почетокот би била составена од сегашните министри, а потоа измени би биле направени во зависност од тоа кој ќе победи на изборите.
Тихановскаја ги загуби претседателските избори одржани на 9 август во кои, според официјалните разултати, Лукашенко освои дури 80% од гласовите, но светот верува дека изборите се наместени. Илјадници граѓани излегоа на протести во земјата против резултатите, по што Тихановскаја пребега во Вилнус каде Литванија ја призна за легитимна претседателка на Белорусија.