Во извештајот на App Annie се наведува дека апликацијата TikTok на Android на дневна база се користи подолго во САД и Обединетото Кралство отколку конкурентот YouTube.
Се посочува дека во овие земји повеќе време се троши на апликацијата TikTok. Се проценува дека ова е последица на фактот дека оваа апликација е подобрена, а тоа важи и за квалитетот на видео-емитувањето.
Апликацијата на YouTube сѐ уште е меѓу петте најкористени - на кои луѓето минуваат најдолго време. Сепак, YouTube, кој е во сопственост на Google, има две милијарди корисници, што е значително повеќе од 700 милиони корисници на TikTok, колку што имаше на средината од минатата година.
Во извештајот, односно истражувањето, биле вклучени само оние што имаат мобилни телефони со системот Android. Но, Кина е исклучена од анкетата, каде што TikTok, познат како Douyin, е најпопуларната апликација.
TikTok во април годинава го надмина YouTube по тоа колку време корисниците трошат на апликацијата. Покрај тоа, апликацијата на TikTok беше најсимнувана во 2020 година.
Треба да се нагласи дека компанијата App Annie е специјализирана за анализа на пазарот на апликации, пишува BBC.