Социјалната мрежа TikTok објави дека ќе им овозможи на американските корисници помлади од 18 години да го ограничат пристапот на еден час дневно, што е една од најрадикалните одлуки во обид да се ублажи употребата на социјалната мрежа од страна на тинејџерите.
Најавено е дека оваа опција ќе биде достапна во следните неколку недели и ќе може да се исклучи. Сепак, вклучувањето на ограничувања може да биде поприфатливо од можноста кинеската социјална мрежа да наметне повеќе ограничувања.
Така, тинејџерите ќе можат да користат TikTok по еден час дневно, по што ќе биде побарано да внесат лозинка доколку наведената опција е вклучена.
Оваа одлука е донесена по долгогодишно следење на влијанието на социјалните мрежи врз младите. Покрај тоа, TikTok е под зголемен притисок од САД, кои се загрижени за неговата вистинска цел. Постојат стравувања дека Кина ја користи оваа социјална мрежа како разузнавачка алатка. Беше спомната и можноста Американците целосно да ја оневозможат употребата на TikTok.
Шефот за доверба и безбедност на TikTok, Кормак Кинан, рече дека се консултирале со експерти во Бостонската детска болница кога размислувале колку да го ограничат пристапот.
„Иако не постои консензус за тоа колку време на екранот е премногу или какво е влијанието, ние признаваме дека на тинејџерите треба да им се даде дополнителна поддршка додека не почнат самостојно да го истражуваат онлајн светот“, рече Кинан.
Тој посочи дека доколку лице помладо од 18 години го исклучи споменатото ограничување и користи TikTok повеќе од 100 минути дневно, ќе биде побарано да си постави временско ограничување.
Кинан објави ажурирање на опцијата Family Pairing, што им овозможува на родителите или старателите да ја поврзат својата сметка на TikTok со онаа на детето, за контрола. Ова ќе значи можност за избор на видеа, односно изоставување видеа што не сакате детето да ги гледа, ограничување на дневната употреба и управување со известувањата.
Социјалните мрежи Instagram и Snapchat имаат слични опции, пренесува CNN.
