Македонија во вторник навечер во Скопје ќе биде домаќин на Велс во второто коло од квалификациите за пласман на Мундијалот 2026. За таа прилика во Скопје ќе дојдат стотина навивачи од Велс, меѓу кои и тимот на велшките навивачи, наречен Велш Фанс Тим.
Велш Фанс Тим е неофицијален фудбалски тим на навивачите на Велс кој игра натпревари кога нивната репрезентација гостува во некоја земја. Досега имаат одиграно 125 натпревари, а последниот им е на гости против Исланд во октомври лани. Понекогаш играат и дома, но повеќето од нивните натпревари се на гостински терен.
Во вторник, на денот на квалификацискиот натпревар, точно на пладне (12:00 часот), велшките навивачи ќе одиграат пријателски натпревар на Тренинг центарот „Петар Милошевски“ на ФФМ во Ново Лисиче против локалниот четвртолигаш Слободен, моментално второпласиран во општинската лига Кисела Вода. За овој скопски тим ќе бидат тешки два дена бидејќи пред овој натпревар треба да го одиграат одложениот лигашки дуел против ССК Младинец вечерва во 19 часот под рефлектори на стадионот „Милан Апостоловски“ во Драчево.
Како што откриваат од ФК Слободен, судиската тројка утре ќе ја сочинуваат женски судии, влезот ќе биде бесплатен, а ќе има и директен пренос на Facebook страницата на Слободен.
Слободен и Велш Фанс Тим ветуваат добра забава за сите што ќе се појават на трибините.
Ова ќе биде втор ваков натпревар за клубот од Аеродром бидејќи во ноември 2023 година на стадионот во Петровец играа против Ингланд Фанс - тимот на англиските навивачи. Тоа беше пред квалификацискиот натпревар за ЕУРО 2024 Македонија - Англија во Скопје, кој заврши 1:1. Во таа прилика англиските навивачи на дождливо време победија со 3:2.
Македонија и Велс, пак, играат утревечер од 20:45 часот на Националната арена „Тодор Проески“, а според последните информации продадени до овој момент се околу 20 илјади билети. Карти сѐ уште има, а целиот приход ФФМ најави дека ќе оди за настраданите од трагичниот пожар во Кочани.
