Досега за случајот со пожарот во Кочани се приведени 18 лица во СВР Штип и СВР Скопје, а задржани се 16 лица, од кои последното се товари за тешки дела против општата сигурност во врска со предизвикување на општа опасност. Лицето е потписник на основен проект за издавање на кабаре клуб – еден од документите потребни за да биде ставена дискотеката во функција. Ова на прес-конференција го истакна министерот за внатрешни работи, Панче Тошковски.
Тој рече дека постојат основи во насока на тоа дека незаконито, паушално биле изготвувани круцијални документи, предуслов за понатамошната постапка за ставање во функција на кабарето.
Извршени се разговори со 71 лице, од кои 42 во Скопје и 29 во Кочани. За 14 е изречена мерка притвор во траење од 48 часа. На 11 лица им е одредена мерка притвор за тешки дела против општата сигурност во врска со предизвикување општа опасност, а на 3 лица за несовесно работење.
Извршени се претреси на 2 лица на Министерство за економија, одземена е техничка опрема, документација, оружје.
Претреси се извршени и кај управителот и одговорното лице во дискотеката, а документи во врска со дискотеката се прибираат и во општината, информираше Тошковски.
