Еден од најважните детали за денот на инаугурацијата е предавањето на нуклеарниот куфер на новиот шеф на Белата куќа.

Многумина се прашуваа како ќе се изврши примопредавањето, имајќи предвид дека Доналд Трамп беше оддалечен илјадници километри од Џо Бајден.
Треба да се знае дека има неколку нуклеарни куфери и, спротивно на она што најмногу се пишува во јавноста, не станува збор за некакво копче или прекинувач, туку збир на шифри, објави телевизиската мрежа NBC.
Една актовка отпатува на Флорида со поранешниот американски претседател Доналд Трамп и неговите шифри истекоа вчера во 11 часот, 59 минути и 59 секунди по локално време, а сетот со шифри на Бајден беше активиран точно напладне (18 часот по наше време).

Резервниот нуклеарен куфер беше кај поранешниот потпретседател на САД Мајк Пенс и тој требаше да му го предаде на новиот потпретседател - Камала Харис.
„Џо Бајден го доби својот ‘бисквит’ (пластична картичка со шифри за нуклеарен напад) најверојатно пред инаугурацијата, како и потпретседателот Камала Харис, а потоа беа запознаени со постапката за започнување нуклеарен напад“, пишуваат американските медиуми.
Вообичаено е нуклеарниот куфер, кој му служи на американскиот претседател за да лансира нуклеарни ракети во секое време, да го носи воен помошник кој мора да биде со претседателот нон-стоп и да му биде предаден на друг помошник кој стои покрај новоизбраниот претседател на инаугурацијата. Овојпат тоа не се случи.