Поранешниот американски претседател Доналд Трамп побара од судот да му го врати неговиот налог на Twitter во обидот да издејствува укинување на трајната забрана за користење на оваа социјална платформа.
Трамп (75) вчера поднесе прелиминарна тужба против интернет гигантот, барајќи брзо враќање на неговиот налог.
Тој тврди дека Twitter го откажал неговиот профил, кој имал околу 80 милиони следбеници, поради притисокот на политичките противници.
На Трамп му беше забрането да ја користи страницата на 8 јануари „поради ризик од натамошно поттикнување на насилство“, соопшти тогаш Twitter.
Тој, исто така, беше исклучен од Facebook и YouTube, откако беше обвинет дека во јануари ги поттикнал своите поддржувачи да се соберат и упаднат во Капитолот, во Вашингтон. Одлуката дојде по неговите неосновани обвинувања за измама, во време кога ги загуби претседателските избори од Џо Бајден.
Адвокатите на Трамп изјавија дека неговиот налог на Twitter стана „дигитално градско собрание“ и важен извор на вести и информации за владините работи.
Меѓутоа, „цензурата и претходните ограничувања на налогот на Трамп на Twitter се вонинституционална повреда на слободата на говорот“, се наведува во барањето до судот.
„Земјата нема да има корист од обидите за ограничување на политичкиот говор. Ќе има уште помала корист од обидите за замолчување на политичките говорници“, се додава во барањето на правниот тим на Трамп до судот за ослободување на неговиот налог на Twitter.