Потпишан е економскиот договор меѓу Белград и Приштина во Белата куќа, пренесуваат српските медиуми.
Потпишувањето на договорот го потврди Џеф Мејсон, асистент на американскиот претседател Доналд Трамп, кој на Twitter објави дека Србија и Косово во Вашингтон потпишале договор за економска нормализација.
Договорот го потпишаа претседателот на Србија, Александар Вучиќ и косовскиот премиер Авдула Хоти.
Претседателот на САД, Доналд Трамп, побрза да се пофали со веста на Twitter.
„Уште еден ден за кој никој не мислеше дека е можно да се случи! Честитки до Вучиќ и Хоти што се обврзаа на економската нормализација. Ова е огромен чекор напред кон просперитет и мир на Балканот и во светот. Горд сум што им помогнав на овие лидери!“с, напиша Трамп во низата твитови.
Според договорот потпишан во Вашингтон денеска, Приштина, меѓу другото, ќе се приклучи на иницијативата за „мини Шенген“, без одлагање ќе започне изградбата на нови патишта и пруги, што подобро ќе го поврзе регионот, а во Белград ќе биде отворена канцеларијата на Американскиот фонд за развој.
Церемонијата на потпишување на договорот, иако беше најавено, не беше пренесувана во живо.
Косовската делегација доцнеше на состанокот во Белата куќа со американскиот претседател Доналд Трамп затоа што Алијансата за иднината на Косово на Рамуш Харадинај се спротивставува на договорот со Србија, поради една од точките за езерото Газиводе, кое се наоѓа на границата помеѓу Србија и Косово.