Американскиот претседател Доналд Трамп изјави дека неговата администрација, доколку биде реизбран, ќе воведе царини за секоја компанија што ќе ги напушти Соединетите Американски Држави за да отворат работни места во друга држава.
– Ние ќе воведеме царини на секоја компанија што ќе ја напушти Америка за да создаде работни места во странство, рече Трамп синоќа во говорот на Републиканската национална конвенција, на која ја прифати кандидатурата за претседателските избори.
Тој вети дека ќе направат сѐ компаниите и работните места да останат во САД.
– Програмата на Џо Бајден е направена во Кина. Мојата агенда е направена во Соединетите Американски Држави, рече Трамп.
Во мај, тој се закани дека ќе наметне нови даноци на американските компании кои произведуваат стоки надвор од САД.
