Американскиот претседател Доналд Трамп изјави дека Кина требало да го спречи COVID-19 уште при самиот извор - Вухан.
„Коронавирусот е подарок од Кина и тоа многу лош подарок. Не успеаја да го спречат да се шири во остатокот од светот“, рече Трамп.
Тој понатаму додаде дека Кина била на чекор да ги стигне САД во 2019 година, но тоа не се случило.
„Кина страшно многу ги искористи САД, а ние помогнавме да се крене Кина на нозе“, додаде Трамп.
Кина денеска пријави три нови случаи на коронавирусот, а сите новозаразени дошле од странство, соопшти Националната комисија за здравство. Забележани се и два нови асимптоматски случаи, кои не се вклучени во официјалната статистика.
Вкупниот број на регистрирани заразени во Кина изнесува 83.030, а од почетокот на епидемијата починале 4.634 лица.
САД имаат 1.965.912 регистрирани случаи на COVID-19, од кои 111.394 починаа, а 738.729 оздравеа.