Американскиот претседател Доналд Трамп во интервју за весникот Washington Post потврди дека САД во 2018 година извршиле кибер напади против Русија, јави дописникот на МИА од Вашингтон.
Нападите биле насочени кон Агенцијата за интернет истражувања од Санкт Петербург, т.н. „фарма на тролови“ која ја предводеше руската вмешаност во изборите во САД во 2016 година.
Трамп истакна дека нападите биле дел од пошироката политика за спротивставување на Русија низ целиот свет, притоа додавајќи оти „никој не бил погруб со Русија“.
Тој во интервјуто за Washington Post истакна дека одлуката за санкционирање на таков виртуелен напад била заснована на информации од американското разузнавање за можна вмешаност на Москва во конгресните избори во 2018 година.
Поранешниот претседател Барак Обама „уште пред изборите знаеше дека Русија си игра околу ова прашање… но не рече ништо. Не стори ништо бидејќи беше убеден во победата на Хилари“, истакна Трамп.