Поранешниот претседател на Соединетите Американски Држави, Доналд Трамп, ја пофали одлуката на американскиот Врховен суд за укинување на 50-годишното законско право на жените на абортус, за Fox News изјави дека пресудата „ќе ги задоволи сите“.
„Ова е почитување на Уставот и враќање на правата каде што одамна требаше да бидат“, рече Трамп.
Запрашан дали има порака за некои од неговите поддржувачи кои можеби се за абортус, Трамп рече дека мисли дека на крајот тоа ќе им се допадне на сите.
„Ова враќа сè во државите каде што отсекогаш припаѓало“, додаде Трамп алудирајќи на тоа дека сега секоја сојузна држава посебно ќе одлучува за правото на абортус.
На прашањето дали мисли дека имал улога во таквата одлука на Врховниот суд, откако назначи тројца конзервативни судии, поранешниот претседател рече: „Бог ја донесе одлуката“.
За време на неговото претседателствување, Трамп ги именуваше конзервативните судии Нил Горсух, Брет Кавано и Ејми Кони Барет во Врховниот суд.
