Голгетерот Иван Тричковски имаше уште една одлична сезона во кипарското првенство, а одличната форма се надева да ја продолжи и на континенталниот собир.
Со 16 голови и 2 асистенции популарниот Тричко ја заврши сезоната како трет најдобар стрелец во кипарската лига, а само два гола го делеа од првото место.
„Одиграв одлична сезона во Кипар, постигнав многу важни голови. Тоа претставува дополнителен мотив за претстојното Европско првенство“, почна тој на денешната прес-конференција во Букурешт.
Во април наполни 34 години и конечно дочека, при крајот на кариерата, да биде дел од едно големо натпреварување.
„Настап на едно вакво големо натпреварување е остварување на сонот на цела нација. Треба да продолжиме таму каде што застанавме. Ќе го дадеме максимумот на секој натпревар и ќе се бориме до крај за дресот со државен грб“, додаде.
Од тинејџер е репрезентативец, почнувајќи од У17 репрезентацијата. За сениорите игра од 2010 и досега има запишано 64 натпревари и постигнато 7 голови, а последно погоди во 4:0 победата над Казахстан, последната проверка пред ЕУРО.
„Селекторот секогаш го има последниот збор, тој одлучува кои 11 фудбалери ќе го започнат натпреварот. Атмосферата во националниот тим е одлична и сите со нетрпение очекуваме да започне првенството“, заврши.