Меленото месо е една од оние намирници кои често ги имаме во замрзнувачот, но треба да имате на ум дека одмрзнувањето на собна температура може да доведе до развој на штетни бактерии.
Температурниот опсег меѓу 5 степени и 60 степени Целзиусови често се нарекува опасна зона биодејќи бактериите кои предизвикуваат труење со храна можат брзо да растат во тој опсег. Фрижидерот е секогаш најбезбедното место за одмрзнување на сите видови меса, вклучително и меленото месо.
Кога однапред знаете дека ќе подготвите мелено месо, најбезбедно е да го одмрзнете во фрижидер. За целосно одмрзнување на половина килограм мелено месо во фрижидерот потребни се околу 12 часа. Задолжително ставете го во длабока чинија за да се складира течноста која ќе истече додека месото се одмрзнува. Ако вашите планови се променат, одмрзнатото месо ќе остане добро еден до два дена во фрижидер.
Ако имате еден час
Ако имате половина килограм замрзнато месо, а ручекот наскоро би требало да биде готов, може да го одмрзнете во сад со студена вода. Првин уверете се дека замрзнатото месо е во водоотпорна амбалажа, а потоа ставете го во сад со студена вода. Треба да ја менувате водата на секој половина час или да додадете коцки лед за да не се загрее премногу. Половина килограм мелено месо во сад со студена вода може да се одмрзна за еден час, а потоа треба веднаш да го подготвите.
Ако имате 5 минути
Ако сте многу гладни, а дома немате ништо освен замрзнато мелено месо може брзо да го одмрзнете во микробранова. Отстранете ја сета амбалажа, ставете го месото на чинија и во микробранова на 50% јачина меѓу 2 до 3 минути.
Вртете го месото на секои 45 секунди додека целосно не се одмрзне. Надворешните делови може да се готват, па користете го меленото месо веднаш по одмрзнување.
