Челси без Ромелу Лукаку одигра 2:2 синоќа на дербито против Ливерпул, а Томас Тухел ја објасни одлуката за исфрлањето на колосниот напаѓач.
Контроверзното интервју на Лукаку за италијански медиум предизвика бура во клубот од Лондон поради неговата носталгија за Интер и незадоволството од тактиките на Тухел.
„За интервјуто слушнав во петокот и мислев дека ќе можеме да се справиме со ситуацијата, не е прв пат вакво нешто да ми се случи во кариерата. Сѐ уште не се чувствувам лично нападнат, разочаран или што и да е. Не е ова лично. Работата стана преголема во саботата, особено ако в недела играш против Ливерпул. Едноставно беше премногу, се создаде премногу врева. Затоа решив да ги заштитам подготовките за натпреварот одлучувајќи тој да не игра“, објаснува Тухел.
„Нормално дека зборувавме за ова и тоа двапати со главните фудбалери. Сфативме дека натпреварот е премногу блиску, а работата отиде предалеку“.
Тој откри дека денеска во клубот ќе дискутира за понатамошните чекори. Дали Лукаку ќе биде казнет, дефинитивно отстранет или вратен во тимот.
„Состанок на темава ќе има в понеделник, затоа ја одложивме одлуката за тоа што ќе правиме понатаму. Ни беше потребно време, а имавме голем натпревар за играње. Целосниот фокус секогаш треба да е на натпреварите“.
„Според мене полесно беше да се фокусираме доколку тој не е во составот и затоа го направив тоа. Одлуката беше тешка, но според мене таа требаше да биде токму таква“.
Челси синоќа одигра интересно дерби во кое успеа да се врати по два гола негатива. Ливерпул водеше со головите на Садио Мане во 9-тата и на Мохамед Салах во 26. минута, а „Сините“ во 42. минута преку Матео Ковачиќ и 45+1 преку Кристијан Пулишиќ дојдоа до бод.
