Заминувањето од „Стемфорд Бриџ“ тешко му паднало на германскиот стручњак, отворено призна Тухел.
Поранешниот тренер на Челси, Томас Тухел, призна дека тешко го прифатил отказот кој го доби на клупата на лондонскиот клуб, пренесуваат британските медиуми.
Тухел за прв пат се огласи преку социјалните мрежи, откако пред пет дена доби отказ од Челси по шокантниот поразот од загрепски Динамо (0:1) во хрватската престолнина во натпреварот од 1. коло во Лигата на шампионите.
„Ова е една од најтешките изјави што некогаш сум морал да ја напишам и за која се надевав дека нема да морам да пишувам уште многу години. Уништен сум што моето време на клупата на Челси заврши. Ова е клуб во кој се чувствував како дома, како професионално, така и лично“, напиша Тухел.
Тој им се заблагодари на колегите, играчите и навивачите на Челси за поддршката.
„Гордоста и задоволството што го почувствував помагајќи му на тимот да ја освои Лигата на шампионите и Светското клупско првенство ќе останат со мене засекогаш. Горд сум што бев дел од историјата на клубот и сеќавањата од последните 19 месеци секогаш ќе имаат посебно место во моето срце“, додаде германскиот стратег.
Тухел (49) го предводеше Челси на точно 100 натпревари и оствари 60 победи, со 16 порази и 24 нерешени.
Раководството на Челси го избра Грем Портер за нов предводник.
Зсаега нема најави дека Тухел ќе преземе некој клуб. Пред Челси ги водеше ПСЖ, Борусија (Д), Маинц и вториот тим на Аугсбург.