Главниот колумбиски наркобос, Даиро Антонио Усуга, познат по прекарот Отониел, кој беше уапсен завчера, е поврзан со балкански трговци со дрога.
Весникот Semana наведува дека Отониел, за да формира мрежа за илегална трговија, воспоставил врски во Панама, Мексико, Доминиканска Република и Белгија.
Semana исто така тврди дека досието до кое Редакцијата имала пристап содржи извештај за преговори со емисари на мексиканските картели, калабриската и сицилијанската мафија во Италија и организација за трговија со дрога на Балканот.
Колумбиските вооружени сили го уапсија Отониел за време на операцијата Озирис во рурална област во регионот Ураба.
Тој е обвинет за испорака на десетици пратки кокаин во САД, како и за убиства на полицајци, сексуално злоставување деца и регрутирање малолетници.
Како падна наркобосот?
Отониел беше уапсен во рурална област во близина на границата со Панама. Во акцијата за негово апсење учествуваа 500 војници, а беа користени и 22 хеликоптери.
Според BBC, Отониел користел мрежа од рурални безбедни куќи. Се селел од една во друга и така се криел од властите. Наркобосот не користел мобилен телефон, туку комуницирал преку курир. Порано полицијата во скривалишта наоѓала специјални ортопедски душеци наменети за Отониел. Се наведува дека овие специјални душеци ги користел поради болки во грбот, односно дискус хернија.
Весникот El Tiempo објави дека властите пред две недели на крајот успеале да го утврдат точното место каде бил уапсен наркобосот. Како што се наведува, неговото движење го следеле повеќе од 50 доушници со помош на сателитски снимки. Во потрагата беа вклучени американски и британски агенции за безбедност.