На Марк Чепмен, убиецот кој на брутален начин го уби легендарниот музичар Џон Ленон, му е одбиена молбата за условно ослободување од затвор.
На Чепмен ова му е 12 пат како се обраќа на Одборот со намера со условна слобода да излезе од затвор.
„Нема да ја префрлам вината на друг. Свесен бев што правам и знаев дека тоа е зло. Знаев дека е погрешно, но толку многу сакав да станам славен што бев подготвен на сè, па дури и одземам човечки живот“, изјави Чепмен пред Одборот за условна казна.
Тој додаде:
„Тоа беше злото во моето срце. Сакав да бидам некој и никој не можеше да го спречи тоа“.
За потсетување, Чепмен го уби Ленон на 8 декември 1980 година, додека славниот музичар и Јоко Оно се враќаа во нивниот стан во Њујорк. Претходно тој ден, Ленон му даде автограм на копија од последниот албум што го реализираше со Јоко Оно.
Чепмен е осуден на доживотна казна затвор во поправна установа во Њујорк. Низ годините повеќе пати изразил каење.
„Повредив многу луѓе, но ако некој сака да ме мрази тоа е во ред. Го разбирам тоа“, изјави убиецот на сослушување одржано во август.
Одбивајќи да го пушти на слобода, Одборот објасни дека светот и понатаму закрепнува од празнината што ја создаде Чепмен.
Следното обраќање за условна слобода е закажано за февруари, 2024 година.
