Германците планираа стадионот во Минхен да блесне во боите на виножитото за утрешниот натпревар против Унгарците, но УЕФА им забрани да го сторат тоа.
Алијанц Арената, која го смени името во Фудбал Арена Минхен за време на ЕУРО, требаше да блесне во виножито како реакција на изгласувањето на законот во унгарскиот Парламент за забрана за „промовирање хомосексуалност“ кај малолетници. Ова предизвика реакции кај активистите за човекови права бидејќи претставува уште едно во низата ограничувања на конзервативната влада на премиерот Виктор Орбан за ЛГБТ лицата.
Градоначалникот на Минхен рече: „Во таква ситуација, настапот на германскиот национален тим против Унгарија нуди јавна платформа од која ќе испратиме јасна порака дека Минхен се залага за разнолико и толерантно општество. Спортот, особено фудбалот, исто така силно ги претставува истите вредности“.
Сепак, стадионот нема да блесне во боите на виножитото, бидејќи УЕФА го карактеризира тоа како политичка порака.
„Според нејзиниот статут, УЕФА е политички и религиозно неутрална организација. Со оглед на политичкиот контекст на ова специјално барање, што е порака насочена кон одлуката на националниот парламент на Унгарија - УЕФА мора да го одбие ова барање", се вели во соопштението на УЕФА.
