УЕФА делумно ја прифати жалбата на Русија поднесена поради изгледот на новиот дрес со кој украинската фудбалска репрезентација ќе настапи на ЕУРО 2020.
Украина од дресот ќе мора да го отстрани натписот „Слава Україні! Героям слава!“ (Слава на Украина! Слава на хероите!), откако УЕФА заклучи дека слоганот испраќа политичка порака и содржи историски и милитантен контекст.
„По детална анализа, натписот 'Героям слава!' очигледно е од политичка природа и затоа треба да биде отстранет од натпреварите во организација на УЕФА, изјави портпаролот на Европската куќа на фудбалот.
Руските политичари го критикува спорниот натпис, наведувајќи дека таа парола за време на Втората светска војна ја користеле украинските националисти, кои се бореле на страна на нацистите против Советската армија.
Картата на која се наоѓа и олуостровот Крим ќе остане на украинскиот дрес, бидејќи, како што истакна УЕФА, станува збор за меѓународно признати граници. Русија во 2014 година еднострано го припои Крим кон своите граници. Иако самите граќани на Крим на референдум одлучија да се припојат кон Русија, западниот свет не ја признава нивната одлука и желба.
Украина веќе играше натпревари со новите дресови и тоа пријателските против Северна Ирска (1:0) и Кипар (4:0), додека во мај против Бахреин (1:1) настапи во старите дресови.
На ЕУРО „Жолто-сините“ прво ќе ѝ се спротивстават на Холандија в недела од 21 часот, а потоа в четврток силите ќе ги одмерат со Македонија, за на крај групната фаза да ја завршат против Австрија на 21 јуни.