УЕФА, ФА со Премиер лигата, РФЕФ со Ла Лига и ФИГЦ со Серија А заеднички ја осудија новонајавената Супер лига.
Европската куќа на фудбалот во заедничко соопштение со фудбалските федерации на Англија, Шпанија и Италија, како и нивните лиги кои, патем, се водечки три на светот, настапија со осуда за најавената Супер лига и најавија бескомпромисна борба против ова фудбалско зло.
„Сите ние дознавме дека неколку англиски, шпански и италијански клубови планираат да создадат затворено натпреварување, таканаречена Супер лига“, почнува соопштението.
„Доколку тоа се случи, сакаме да повториме дека ние - УЕФА, ФА, РФЕФ, ФИГЦ, Премиер лига, Ла Лига, Серија А, но и ФИФА и сите нејзини членки - ќе останеме обединети во нашите напори да спречиме ваков циничен проект, проект кој е создаден врз интересот на неколку клубови во време кога на општеството му е потребна солидарност повеќе од било кога“.
„Ќе ги земеме предвид сите расположливи мерки, на сите нивоа, и правни и спортски со цел да спречиме ова да се случи. Фудбалот се базира врз отворени натпреварувања и спортска заслуга; не смее да биде на друг начин“.
„Како што претходно објави ФИФА и шесте конфедерации, клубовите учесници ќе бидат суспендирани од учество во сите натпреварувања на домашно, европско и светско ниво, а на нивните играчи ќе им биде забрането да ги претставуваат своите репрезентации“.
„Им се заблагодаруваме на оние клубови од дрите земји, особено на француските и на германските клубови, кои одбиле да се приклучат во ова. Ги повикуваме сите љубители на фудбалот, навивачи и политичари, да ни се придружат во борбата против ваков проект доколку се оствари. Овој постојан себичен интерес на неколкумина веќе предолго трае. Доста е“, завршува соопштението.
