УЕФА вчера донесе историска одлука. Го укинува правилото за гол во гости, едно од најконтроверзните во нејзината историја.
Почнувајќи од оваа сезона, правилото за гол во гости за сите натпреварувања што се под јурисдикција на УЕФА, се укинува. Во случај на нерешен резултат по два натпревари, ќе се играат две продолженија од по 15 минути, објави УЕФА на својот официјален профил на Twitter.
Претседателот на УЕФА Александар Чеферин изјави дека ова правило постои од 1965 година, но дека за неговото укинување се дискутирало во последните неколку години.
„Иако немаше едногласност, многу тренери, навивачи и други чинители во фудбалот ја доведоа во прашање неговата правичност и изразија тенденција кон укинување на правилото“, рече Чеферин.
„Реалноста на правилото сега е во спротивност со неговата првична цел, затоа што домашниот тим во овој случај всушност не сака да напаѓа затоа што се плаши да прими гол што ќе им донесе решавачка предност на противниците. Критикувана беше и неправедноста, особено во продолженијата, кога домашниот тим е должен да постигне два гола ако гостинскиот тим постигне еден“, додаде лидерот на УЕФА.
Извршниот одбор на УЕФА заклучи дека „веќе не е соодветно голот во гости да носи поголема тежина од оној постигнат на домашен терен“ и затоа треба да се укине правилото за гол во гости.