Првиот човек на Европската куќа на фудбалот, Александар Чеферин, ја отфрли идејата да се повтори системот како на овогодинешното ЕУРО.
Словенецот смета дека турнир во 12 градови не е лоша идеја, но е тешко да се постигне организациски, но и за навивачите.
Чеферин потврди дека вакво Европско првенство нема да се повтори.
„Повеќе нема да ја поддржувам оваа идеја. Бара премногу, а не е коректна, бидејќи некои репрезентации треба да поминат 10.000 километри, а други 1.000, на пример. Не е фер за навивачите“, изјави Чеферин за BBC.
Тој исто така објасни дека не е фер за некои навивачи да патуваат од Италија во Азербејџан за само неколку дена, како што беше случај во групата А.
„Некои навивачи треба да бидат во Рим, а потоа следните неколку дена во Баку. Летот е четири и пол часа... Тешко е, иако идејата е интересна, сепак е тешко остварлива. Мислам дека нема веќе никогаш да има ваков турнир“, заклучи тој.
На ЕУРО останува само последниот натпревар, во кој Италија и Англија ќе се сретнат во недела со почеток во 21 часот на Вембли во Лондон.