По финалното шоу на овогодинешниот Евросонг, се одржа прес-конференција на која победниците - членови на украинската група Kalush Orchestra - се обратија пред публиката и порачаа дека политиката не е единствената причина за нивната победа.
Украинските претставници освоија вкупно 631 поен, а од публиката добија неверојатни 439 поени. Од самиот почеток обложувалниците им предвидуваа висока позиција, што на крајот и се оствари.
На прес-конференцијата одржана по финалето, новинарите ги прашаа дали мислат дека победиле благодарение на актуелната политичка ситуација во која се наоѓа нивната земја.
„Нашата песна беше многу слушана уште пред Русија да ја нападне Украина. Секако, победата е многу значајна за Украина оваа година поради сѐ што ни се случува“, велат тие.
Додадоа дека сѐ уште не добиле повик од украинскиот претседател Володимир Зеленски, кој на социјалните мрежи објави дека ќе биде домаќин на Евровизија во реновираниот Мариупол.
Членовите на групата имаа слична порака: „Тој е зафатен. Но, ние ќе бидеме среќни да бидеме домаќини на Европа следната година во нова, среќна Украина“, велат тие.
Kalush Orchestra го носи името на украински град, а победничката песна „Stefania“ е посветена на мајката на фронтменот, но и на сите други мајки и зборува за нивните предизвици во денешниот свет.