Советот за надворешни работи на Европската Унија денеска заседава во Брисел, а една од темите ќе биде руската агресија врз Украина.
Унгарија ќе се изјасни против продолжувањето на воената помош за Украина на сметка на европските даночни обврзници на состанокот на министрите за надворешни работи на ЕУ што ќе се отвори во Брисел.
Ова го изјави унгарскиот министер за надворешни работи и економски односи Петер Сијарто, што е токму ставот на оваа земја од почетокот.
„Брисел сега е целосно изолиран во светската политика од либералните европски провоени политичари кои постојано се обидуваат да го попречат успехот на мировните преговори. Денеска во Брисел ќе има неколку предлози на агендата со кои се бара да ѝ се дадат на Украина милијарди евра или оружје од парите на европските даночни обврзници. Одиме во Брисел да се спротивставиме на провоените преговори“, рече тој.
Каја Калас, високата претставничка на ЕУ за надворешна политика и безбедност, се очекува денеска да претстави иницијатива за зголемена воена поддршка на Украина во 2025 година, со безбедносни гаранции и зајакнување на одбранбениот потенцијал на земјата.
Дополнително, една од темите треба да бидат односите меѓу ЕУ и Америка и влијанието на американските надворешнополитички одлуки и европскиот одговор на нив.
