Олимпискиот комитет на Северна Македонија преку социјалните мрежи соопшти дека дочекот на Дејан Георгиевски, кој вчера освои сребрен медал во теквондо на Олимписките игри во Токио, ќе биде утре во 19:30 часот.
Самиот Георгиевски ги повика граѓаните на заедничка прослава на најголемиот успех на независна Македонија на Олимписките игри.
„Благодарам за поддршката кон мене и мојот тим. Од Олимписките игри донесов сребрен медал со златен отсјај. Ве повикувам утре, четврток, во 19:30 часот на Триумфална порта на плоштадот заедно да го прославиме овој успех“, рече Георгиевски.
За постигнатиот резултат Дејан Георгиевски е награден со 1.2 милиони денари од Владата и со 600.000 денари од Агенцијата за млади и спорт.