Под мотото „Лупење идеи“, годинава од 18 до 25 август ќе се одржи 13-тото по ред издание на Фестивалот на креативен документарен филм МакеДокс. Фокусот на годинешното издание е ставен на развојот на идеите.
Фестивалот ќе се одржи на четири локации во Скопје, и тоа во Куршумли ан, пред платото на Музејот на Македонија, Младинскиот културен центар и во Europe house.
Еден од документарците кои ќе бидат прикажани во главната програма е „Ведет“ на Клодин Борис и Патрис Шањард.
„Ведет е крава. Ведет е кралица. Всушност, таа своевремено била кралица на кралиците на алпските пасишта. Но Ведет е сега стара и со цел да биде поштедена од понижувањето и надминувањето од помладите ривалки, нашите соседи нè замолија да се грижиме за неа преку летото. Тогаш и откривме дека секоја крава е посебна. Приказната се одвива на една висока долина во срцето на Швајцарските Алпи“, стои во краткото сиже претставено од МакеДокс.
Претходните документарни филмови на Борис и Шањард најчесто се случуваа во градови или урбани средини. Што ги мотивираше овојпат да се фокусираат на борбите со крави во горната долина на Швајцарија?
„За нас борбите беа главно добра почетна точка. Фактот дека тие крави, тие ‘кралици’ како што ги нарекуваат Швајцарците, се борци, е навистина фасцинантен. Но, јас и Клодин размислувавме многу за начинот на кој луѓето комуницираат со животните неколку години, на филозофски, поетски и политички начин. Да, кравите се убави и величествени, а исто така убава е и долината. Но, уште поважно, почувствувавме дека тие се сретнаа со нашите сопствени размислувања за местото на човештвото во природниот свет“, објаснува Шањард.
„We the People, The Arrivals и Rules of the Game беа три филмови за политички прашања, како што е ситуацијата на барателите на азил или тешкотијата да се најде работа во нашето сегашно општество... Ведет прави огледало на нашиот свет на многу поинаков начин.“
Борис, пак, објаснува дека нивниот филм секогаш бил политички.
„Нашите претходни филмови беа навистина појасни во врска со тоа, тие се осврнаа на јасни проблеми во начинот на кој нашето општество функционира или не функционира. Но, во последно време, јас и Патрис ја гледаме големата слика. Стоиме среде голема еколошка криза и тоа не тера да го преиспитаме начинот на кој се однесуваме кон другите живи суштества. Ја делиме нашата планета со животните, а сепак ги брутализираме. Капиталистичкото општество и масовната потрошувачка ги експлоатираат. И нè тера да се запрашаме: како и зошто дојдовме до воспоставување таков однос со другите живи суштества?“
Шањард се надоврзува дека се убедени дека начинот на кој се однесуваме кон животните кажува многу за начинот на кој се однесуваме кон другите луѓе.
„Историјата многупати го докажала тоа. Со фокусирање на нашите интеракции со животните, и запомнувајќи дека животинскиот живот е навистина живот, можеме да ја преиспитаме сопствената човечност и нашето место во светот насекаде околу нас.“
Ведет е кралица. Зошто фармерите се толку желни да имаат кралица?
„Затоа што доаѓа со многу престиж! Не можете да ја замислите гордоста да имате добра кралица. Но, ние живееме во капиталистички свет и за жал, тие крави сега стануваат скапи. Некои луѓе не се двоумат да платат многу пари за кралица. Бидејќи тоа значи дека и нејзиното потомство може да се продаде за добра цена, бидејќи ќерката на кралицата има поголеми шанси и да стане кралица“, вели Шањард, а Борис појаснува дека во оваа област, животното е дел од семејството и дека фармерите ги чуваат портретите на своите кралици покрај оние на членовите на семејството.
„Тоа покажува неверојатна врска. Животните не се едноставен начин да заработат за живот. Филмот стои како доказ дека односите меѓу луѓето и животните можат да бидат многу попочитувани и понежни отколку што се денес.“
Сите новости и евентуални измени во програмата ва 13-тиот МакеДокс можат да се следат на настанот на Facebook.
