Венецијанските гондолиери мораа да ги намалат капацитетите на нивните пловни објекти за што ги обвинуваат туристите кои не можат да се возат во гондолите бидејќи се предебели, пренесе Guardian.
Лимитот за гондола која нуди класична обиколка по каналите е намален од шест на пет патници, додека за гондола која плови по Големиот канал е намален од 14 на 12 луѓе.
„Вистина е дека за споредба од пред 10 или 15 години туристите тежат повеќе“, вели Андреа Балби, претседател на задруга на гондолиери во Венеција. „За разлика од лифтовите во зградите каде јасно пишува максимален број на луѓе или килограми, ние туристите не можеме да ги мериме па мораме да го намалиме бројот на патници, за да не влегува вода во чамецот“, додава тој.
Раул Роверато од друга задруга на гондолиери не бираше зборови во интервјуто за La Repubblica.
„Туристите денес се предебели, посебно од некои земји. Да тргнете со товар од над пола тон месо е опасно“, вели тој.