Поранешниот долгогодишен предводник на Арсенал смета дека Англичаните ќе му бидат главниот ривал на актуелниот светски шампион за освојувањето на трофејот на УЕФА.
Како и секој, така и Арсен Венгер има свој фаворит на претстојното Европско првенство. Не дека Франција е негова татковина, туку едноставно тој е импресиониран од силината и талентот со кои располагаат „Ле Блу“, а пред се младоста на составот на селекторот Дидје Дешан.
„Тие не се фаворити, тие се супер фаворити. Фаворити не е доволно бидејќи кога ќе се освои Мундијал, а притоа во составот се играчи како Канте, Погба, Бензема, Гризман, Коман, Жиру, Дембеле... На клупата имаат 11 играчи кои едноставно можат да играат во било која репрезентација. Не можете да го порекнете фактот што тие се светски шампион, а го немаат достигнато својот пик. Тие се тим кој сѐ уште оди напред, бидејќи имаат многу млади момци. Освен два-тројца, во костурот на тимот се многу млади“, вели тој за Sky Sports.
И да е главен фаворит Франција, мора да постои некоја репрезентација која би ѝ парирала. За Венгер тоа е Англија.
„Англија има одлични фудбалери. Можеби дел од нив сѐ уште се доста млади, но сезонава со Мејсон Маунт, Фоден, потоа Грилиш, Деклан Рајс, и нормално Хари Кејн напред и некои поискусни како Хендерсон, тие можат да ѝ парираат на Франција“.
Англија е една од земјите домаќини и е во групата Д заедно со Шкотска, Хрватска и Чешка, додека Франција е во „групата на смртта“ со Германија, Португалија и Унгарија. Во зависност од пласманот, Франција и Ангија би можеле да се сретнат уште пред финалето.
