Скот Сутфин-Гловски, долгогодишен инженер на Microsoft, поднесе оставка по 13 години во компанијата, наведувајќи ја континуираната продажба на Cloud услуги на израелската војска и одбивањето на компанијата да разговара за војната во Газа. Сутфин-Гловски, главен софтверски инженер, им кажа на колегите вчера дека ова е неговата последна недела во компанијата, објави CNBC.
„Повеќе не можам да бидам дел од овозможувањето на она што може да бидат најлошите злосторства на нашето време“, напиша тој во проштална порака. Во писмото се цитира статија на Associated Press од февруари во која се вели дека израелската војска имала најмалку 635 претплати на Microsoft и се тврди дека огромното мнозинство сè уште се активни.
Microsoft одби да коментира за случајот.
Заминувањето на Сутфин-Гловски доаѓа само еден ден откако претседателот Доналд Трамп објави дека Израел и Хамас се обврзале на првата фаза од мировниот план, две години по почетокот на последниот конфликт. Associated Press во четвртокot објави, повикувајќи се на владини претставници, дека Соединетите Американски Држави испраќаат околу 200 војници во Израел за да го поддржат договорот за прекин на огнот.
Конфликтот е извор на континуирани тензии во рамките на Microsoft со месеци. Вработените протестираат против работењето на компанијата со израелската војска, а петмина се отпуштени. Во септември, Microsoft соопшти дека престанува да обезбедува одредени услуги за оддел на израелското Министерство за одбрана, без да даде детали. Одлуката следеше по извештајот во The Guardian дека Единицата 8200 на израелските одбранбени сили изградила систем за следење на палестинските телефонски повици.
Сутфин-Гловски, исто така, рече дека компанијата ги затворила внатрешните комуникациски канали што им овозможувале на вработените да изразат загриженост во врска со употребата на производите на Microsoft од страна на израелската војска.
Надвор од седиштето на Microsoft вчера во Редмонд вработените и членовите на заедницата развија транспаренти со кои ја повикуваат компанијата да ги прекине врските со Израел, објави групата No Azure for Apartheid. Групата побара од Microsoft да ги сослуша повеќе од 1.500 вработени кои поднесоа петиција до компанијата за поддршка на прекинот на огнот.
„Денес, прекинот на огнот во Газа конечно стапува на сила по две години геноцид, но злосторствата, кршењата на човековите права, воените злосторства, апартхејдот и окупацијата продолжуваат“, заклучи Сутфин-Гловски во својата порака.
