Криптовалутите минатиот петок нагло паднаа во краток, но значаен „flash crash“, што им донесе загуби од повеќе милијарди долари на инвеститорите и уште еднаш ја истакна волатилноста што ја одликува оваа индустрија, пишува CNN.
Трговците ги потресе заканата на претседателот Доналд Трамп за воведување нови царини на кинескиот увоз, што поттикна масовна продажба на ризични средства како технолошки акции и криптовалути, како и бегство на инвеститорите кон сигурни засолништа како златото и среброто, чии цени достигнаа рекордни нивоа.
Од биткоин до т.н. мимкоин, вредноста на криптовалутите потона додека инвеститорите ги распродаваа своите удели, а позиции со висока финансиска полуга беа затворани среде остар и неочекуван пад.
Овој мини-колапс резултираше со ликвидација на позиции во рекордна вредност од 19 милијарди долари, според анализа на податоци од компанијата CoinGlass. Иако цените на криптовалутите во меѓувреме се закрепнаа, се проценува дека минатиот петок биле ликвидирани околу 1,6 милиони трговци, наведува The Kobeissi Letter.
По заканата на Трамп за царини, нервозните инвеститори се ослободија од поризичните вложувања и ја побараа сигурноста во државните обврзници и златото.
Технолошкиот индекс Nasdaq Composite падна за 3,56%, додека биткоинот во еден момент забележа пад од 15%. Индексот S&P 500 го имаше најлошиот ден од април наваму.
Биткоинот во петокот попладне падна од околу 122.500 долари на најниско ниво од приближно 104.600 долари. Етереум, втората најголема криптовалута по пазарна вредност, се намали за приближно 21%.
„Агресивната распродажба на криптовалутите беше поттикната од паника поради ризикот“, изјави Лукман Отунуга, виш пазарен аналитичар во FXTM.
Високо-спекулативните коини беа уште потешко погодени: Dogecoin падна за повеќе од 50%, според податоци на CoinMarketCap. Вредноста на коинот $TRUMP, поврзан со Доналд Трамп, во еден момент се намали за околу 63%.
Инвеститорите се загрижија и за можни технички недостатоци на крипто-пазарот, откако „стејблкоин“ на берзата Binance накратко се одвои од својот курс 1:1 со американскиот долар.
„Некои модули на платформата привремено имаа технички потешкотии, а одредени средства имаа проблеми со одржувањето на вредноста поради нагли пазарни флуктуации“, соопшти Binance.
Корисници на социјалните мрежи исто така изразија сомнеж дека анонимни сметки можеби профитирале од „short“-ирање на пазарот, односно вложување на пад на цените, како и дека можеби имало тргување со инсајдерски информации. Иако ваквите шпекулации се чести во одредени сегменти од крипто-пазарот, ова е обвинување што е исклучително тешко да се докаже.
Биткоинот вчера се движеше околу 115.000 долари, стабилизирајќи се по падот под 105.000 долари минатиот петок, но сѐ уште не успеа целосно да ги надомести загубите. Потсетување, на 6 октомври постигна рекордно ниво од над 126.000 долари.
„Структурните фактори – усвојувањето на ETF-ови, институционалните приливи и регулаторната јаснотија – продолжуваат да го поддржуваат долгорочниот раст“, изјави Кербаџ од Hashdex.
Иако крипто-пазарот благо се закрепна, а акциите во понеделник забележаа раст, несигурноста останува висока. Фјучерсите на сребро – сигурно засолниште во несигурни времиња – вчера скокнаа за 7% и достигнаа историски максимум.
