Полицијата приведе едно лице во врска со сообраќајната несреќа во Скопје во која вчера загина 19-годишен мотоциклист од Скопско.
„На 07.08.2026 во 12:12 часот во СВР Скопје е пријавено дека на ул. 'Радишанска' во Скопје се случила сообраќајна несреќа помеѓу патничко возило Alfa Romeo со италијански регистарски ознаки, управувано од С.Б. (47) од Скопје со привремен престој во Скопје и мотоцикл Kawasaki со скопски регистарски таблички, управуван од Н.М. (19) од с. Побожје, Скопско. Од здобиените повреди на местото на несреќата починал мотоциклистот Н.М.. Лекар од Итна медицинска помош констатирал смрт, а по наредба на јавен обвинител телото на починатиот било дадено на обдукција. Додека, со телесни повреди се здобил возачот С.Б., констатирани во ЈЗУ 'Св. Наум Охридски'“, соопшти МВР.
За време на вршење на увидот и по преземени мерки и обезбеден видео запис дојдено е до сознание дека во предизвикување на несреќата, но без физички контакт, учествува и патничко возило Seat Altea со скопски регистарски ознаки, по што возачот со возилото го напуштил местото без да им укаже помош на повредените.
По дополнително преземени мерки, околу 19:40 часот во Арачиново, Скопско, пронајдено е возилото и возачот С.О. (46) од селото. Тој е лишен од слобода, спроведен е во полициска станица и со него е извршен службен разговор. По целосно документирање на случајот, ќе биде поднесена соодветна пријава.
