Во врска со медиумските написи поврзани со фестивалот „Земјотрес“, Младинскиот културен центар – Скопје (МКЦ) ја информира јавноста за следното, со цел расчистување на неточни и погрешно интерпретирани наводи.
МКЦ е јавна културна установа, а не приватен субјект, ниту сопственик или организатор на независни фестивали. Институцијата нема сопственички, програмски или управувачки ингеренции врз фестивалот „Земјотрес“, ниту пак располага со него како со „своја“ манифестација.
Фестивалот „Земјотрес“ не е и никогаш не бил финансиран од МКЦ. Соработката со организаторот се реализирала исклучиво преку договор за користење на простор, со јасно утврдени услови и финансиска компензација, што претставува стандардна пракса за сите надворешни корисници на јавните простори на МКЦ. Во таа насока, директорот на МКЦ, Арбен Шаќири, во 2024 и 2025 година е потписник на договорите со носителите на фестивалот „Земјотрес“, што е факт за кој можат да посведочат и самите организатори.
Во дел од објавените текстови се создава впечаток дека МКЦ има улога на приватен одлучувач или субјект кој може да „задржи“, „избрка“ или „загуби“ независен фестивал. Ваквите формулации се фактички неточни и доведуваат до погрешна перцепција за улогата на јавните институции.
Буџетските состојби и финансиските капацитети на МКЦ се резултат на јавни буџетски политики и институционални одлуки, а не на селективен или намерен однос кон поединечни културни иницијативи. Поврзувањето на овие состојби со наводно намерно исклучување на фестивал е неосновано и неточно.
МКЦ останува отворен и достапен простор за соработка со независната културна сцена, во рамки на својата јавна мисија, законските надлежности и реалните финансиски можности.
Апелираме до медиумите за прецизно, одговорно и фактичко известување, со јасно разграничување меѓу улогата на јавна установа и независни културни организатори.
