Осумнаесет прекршоци за неисправност и непочитување на правилата за пловење изрече Капетанија на пристаништа, по засилените контроли во Охридското Езеро.
По извршените редовни и вонредни контроли над пловилата, констатирани се прекршоци во делот на ноќното пловење како и претовар на патници, истакнаа од Капетанија на пристаништата.
„Направени се 3 редовни надзори на бродови, 4 вонредни надзори на катамарани, 2 вонредни надзори на пасари со надградба (тоа се бродови до 12 патници), како и 19 вонредни надзори на кајчиња. Од извршените вкупни надзори констатирани се 18 прекршоци на чамци и тоа за ноќно пловење, непоседување уверение за управувач на чамец, неистакната регистарска ознака и еден катамаран е казнет за претовар на патници“, изјави Илија Арнаудоски капетан во Капетанија на пристаништа и додаде:
„Во следните месеци, а посебно во летниот период, најавуваме зголемени инспекциските надзори во соработка со езерската полиција. Уште еден апел до сите учесници во внатрешната пловидба, навремено да си ги регистрираат своите чамци, да ги извршуваат обврските на пловилата и да се придржуваат до правилата и мерките за безбедна пловидба“.
