Познатиот кочански ориз се враќа на пазарот во Хрватска откако се потпиша Повелба за соработка меѓу Кочани и хрватскиот град Скрадин.
„Ги отвораме вратите на традиционалните простори за извоз на кочанскиот ориз! Во Скрадин (Хрватска) на Фестивалот на рижото потпишавме Повелба за соработка помеѓу Кочани и Скрадин, документ кој отвора врати за ново пријателство, туризам и културна размена. Оризот, нашето бело злато, повторно добива место што заслужува. Со ова партнерство се отвораат можности за сите што се занимаваат со производство и продажба на кочански ориз да влезат на еден голем пазар кој традиционално не така одамна му припаѓал токму на Кочани“, соопшти градоначалникот на Кочани, Венко Крстевски.
Од Општина Кочани соопштија дека ќе дадат јасни насоки и ќе обезбедат простор и штандови за следното издание на фестивалот во 2026 година. Тоа значи дека сите оризопроизводители и бизниси од Кочанско ќе имаат прилика директно да го претстават својот производ пред хрватските потрошувачи и бизниси кои работат со ориз.
„Ова е само почеток. Оризот не е само храна, тоа е нашата историја, нашата култура и нашата традиција. Со срце и душа за Кочани!“, заврши Крстевски, кој е независен кандидат за градоначалник и на претстојните локални избори.
