Одлуката на Владата на ВМРО-ДПМНЕ и премиерот Христијан Мицкоски за издавање нови 10.000 дозволи за престој и работа на странски државјани е уште еден доказ дека оваа власт свесно ја жртвува иднината на сопствениот народ во корист на профитот на крупниот капитал, сметаат од Левица.
„Наместо политики што ќе го задржат и вратат младото и работоспособно население, ДПМНЕ гради модел на држава со празни домови и полни бизниси со евтина, увезена работна сила. Владата на Мицкоски отворено застанува на страната на газдите прифаќајќи ја логиката дека платите треба да се притискаат НАДОЛУ, а правата на работниците да се МИНИМИЗИРААТ, за да се зголеми профитот на малкумина. Со тоа, трудот на македонскиот работник се девалвира, а државата се претвора во сервис на стопанските елити, предводени од луѓе како Бранко Азески, кои одамна ја диктираат економската политика, без изборен легитимитет, но со огромна моќ“, велат од политичката партија Левица, која во македонското собрание е застапена со 6 пратеници.
Оттаму посочуваат дека „ова е отворено признание дека Владата не планира да ја крене вредноста на трудот, туку да ја собори. Кога македонски работници масовно си заминуваат поради ПОНИЖУВАЧКО ниски плати, ДПМНЕ не гледа проблем во платите, туку во тоа што нема доволно 'резервна армија' за експлоатација“, додаваат од црвената партија.
Левица отсекогаш како една од примарните борби ја посочуваше минималната плата, за која постојано се залага да се зголемува.
„Увозот на работници е и геополитичка операција. Со истата логика, ќе се отвораат вратите за масовен прилив на МИГРАНТИ од Британија, за што веќе најавија тамошните медиуми. Додека македонските граѓани заминуваат во странство да работат како луѓе од втор ред, Владата на ДПМНЕ се подготвува Македонија да ја претвори во резервоар на евтина работна сила и прифатен центар за туѓи социјални проблеми.“
