Невремето го турна крстот на црквата „Св. Јован“ во Бутел, откорнати покриви, паднати дрвја и искинати кабли за струја пријавуваат скопјани.
За десетина минути орканскиот ветер што го зафати Скопје предизвика штети во сите скопски наделби.
Граѓани од Бутел 1 пријавија дека ветрот го турнал крстот на црквата „Свети Јован Крстител“, а крстот на камбанаријата, пак, е извиткан.
Скопјани од цел град на социјалните мрежи објавуваат снимки и фотографии од покриви што летаат, од дрвја паднати сосе кабли за струја, врз автомобижи и од направените штети.
Скопјани се жалат и дека бројот 112 на кој можат да пријават штети е постојано зафатен па сè што имаат објавуваат на социјалните мрежи.
Во делови од градот нема струја, но и телефонот на ЕВН е постојано зафатен.
До крајот на денот и во вечерните часови ќе се задржи нестабилноста проследена со пороен дожд, грмежи и засилен до силен ветер. Ќе има услови за невреме со појава на град. Во текот на ноќта се очекува стабилизација.
Времето утре ќе биде променливо облачно со сончеви периоди. Ќе има локална нестабилност со пороен дожд, грмежи, засилен ветер и услови за изолирано невреме со појава на град. Ќе дува слаб до умерен, а долж Повардарието повремено засилен ветер од северен правец. Во западните делови ќе дува слаб до умерен, повремено засилен западен ветер. Минималната температура ќе биде во интервал од 12 до 21, а максималната ќе достигне од 27 до 33 степени Целзиусови.
Во Скопје, променливо облачно со сончеви периоди. Во делови од котлината ќе има појава на нестабилност со пороен дожд, грмежи и засилен ветер. Минималната температура ќе се спушти до 17, а максималната ќе достигне до 30 степени Целзиусови.
До петок под влијание на серија на влажни и нестабилни воздушни маси, времето ќе биде променливо облачно и наместа нестабилно со пороен дожд и грмежи. Локално процесите ќе бидат во форма на краткотрајно невреме проследено со силен ветер и изолирана појава на град. Во петок ќе има пообилни врнежи од дожд. Поради продор на постудена воздушна маса од север температурата значително ќе опадне.
