Албанскиот премиер ја пречека Џорџа Мелони на колена

За време на посетата на Албанија, италијанската премиерка Џорџа Мелони разговараше со домаќинот Еди Рама. Средбата меѓу Мелони и Рама беше обележана и со еден необичен детаљ.

Рама, како и во некои претходни прилики, клекна пред италијанската премиерка, што ја насмеа италијанската лидерка. „Не, Еди“, му рече Мелони со смеа. „Го прави тоа за да биде висок колку мене“, додаде таа, по што следеше срдечна прегратка.

Рама клекна пред Мелони и во јануари оваа година, кога ѝ посака среќен роденден.

Мелони и Рама разговараа за низа теми, вклучувајќи го и кампот за мигранти што е изграден во Ѓадер, во регионот Лежа. Мигрантите од трети земји што се враќаат од Италија ќе бидат привремено сместени таму додека не им се проверат документите.

Мелони, зборувајќи од Тирана каде што присуствува на состанок на Европската политичка заедница, рече дека во оваа пригода не го посетила кампот, но дека работата таму напредува брзо, што покажува дека сè е „на вистинскиот пат“.

На прашањето дали поминала покрај центарот за мигранти, таа одговори:

„Немав време. Работата продолжува и ова покажува колку брзо сè оди, што потврдува дека, како што ветивме, одиме во вистинската насока“.

Мелони се осврна и на војната во Украина, велејќи дека Европската Унија мора да инсистира на безусловно примирје и сериозен мировен договор што би вклучувал безбедносни гаранции за Киев.

„Не смееме да бараме алтернативи. Мора да инсистираме на сериозни мировни договори и безусловно примирје, со безбедносни гаранции за Украина. Работиме на тоа“, рече Мелони.