Граѓаните се судрија со полицијата во Нови Сад, фрлен солзавец

Пред судницата и канцеларијата на државниот обвинител на улицата „Сутјеска“ во Нови Сад, голем број граѓани и студенти се собраа утрово за да побараат итно ослободување од притвор на шест активисти од опозициските организации STAV (Studenti protiv autoritarne vlasti) и PSG (Pokret slobodnih građana), објавува N1.

Активистите се во притвор во затворот Клиса веќе 60 дена, а судот вчера им го продолжи притворот за дополнителни 30 дена.

Толпата го исполни и просторот пред задниот влез во зградата, каде што околу педесет вработени се обидоа да влезат на своите работни места. Во тој момент, избувна тепачка меѓу собраните граѓани и припадниците на интервентната полиција кои се обидоа да им дозволат на вработените да поминат.

Кога не успеаја да го сторат тоа, жандармеријата беше повикана да помогне, а припадници на полицијата пристигнаа во поголем број. Ситуацијата ескалираше кога, според сведоштвото на студент за N1, кон граѓаните во првите редови бил фрлен солзавец.

„Не напаѓајте невооружени луѓе, што правите, не врз мирни граѓани!“ извика еден граѓанин преку мегафон кон полицијата, додека толпата извикуваше слогани како „Србија!“ и „Пуштете ги сите!“

Една жена, исто така, ја предупреди толпата преку мегафон дека полициското засилување се приближува одзади, што предизвика туркање меѓу толпата.

Шестмината уапсени активисти се обвинети за обид за соборување на уставниот поредок, а сите се уапсени врз основа на аудиоснимка од прислушуван разговор што беше емитувана на провладините телевизиски станици на 14 март. Адвокатите на обвинетите постојано нагласуваат дека Агенцијата за безбедност и информации (БИА) ја добила снимката нелегално и дека таа не може да биде правно валиден доказ.

Шест други активисти на STAV се обвинети за истото кривично дело, но тие не биле во Србија во времето на апсењата и уште се во странство.