Претседателот на словенечкиот парламент, Зоран Стевановиќ, предложи одржување референдум за членството на Словенија во НАТО, наведувајќи дека тој би можело да се организира истовремено со локалните избори закажани за 15 ноември.
Во видеопорака објавена на официјалниот профил на партијата Ресница на социјалната мрежа X, Стевановиќ рече дека, поради високите трошоци, на тој ден би можел да се одржи „мега референдум“ покрај најавените референдуми за разгледување на членството на земјата во Алијансата.
Во исто време, тој изрази противење на испраќањето финансиска помош за Украина, откако премиерот Јанез Јанша на самитот на НАТО во Анкара соопшти дека Словенија ќе издвои 50 милиони долари, или околу 44 милиони евра, за воена помош за Киев оваа година како дел од иницијативата PURL, објавија регионалните медиуми.
„Овие 44 милиони се многу попотребни за Словенија во овој момент. Ако се стремиме кон мир, нешто мора да се промени“, рече Стевановиќ, додавајќи дека војната во Украина продолжува и покрај досега обезбедената помош.
Kaj pravite na to idejo?
— Resni.ca (@resni_ca) July 9, 2026
Moč ljudem! ✊ pic.twitter.com/TpXUZZ6sMi
Неговите изјави доаѓаат по самитот на НАТО, на кој лидерите на земјите-членки разговараа за поддршка на Украина и зголемување на трошоците за одбрана на пет проценти од БДП до 2035 година.
Словенечкиот министер за надворешни и европски работи Тоне Кајзер рече дека НАТО е темел на безбедноста на земјата, додека партијата на Социјалдемократите (СД) го оцени предлогот на Стевановиќ како обид за одвлекување на вниманието.
Ресница на Стевановиќ се залага за излез на земјата од НАТО.
