Србија вчера беше единствената што не ја потпиша Киевската декларација, која, меѓу другото, ја обвинува Русија за агресија врз Украина и повикува на итен прекин на војната, објави Српската радиотелевизија (РТС).
На самитот Украина-Југоисточна Европа, што се одржа во Киев, учесниците ја усвоија заедничката Киевска декларација, во која се обврзаа да продолжат со политичката, воената, финансиската и безбедносната поддршка на Украина, да го зголемат притисокот врз Русија и да соработуваат во обновата на земјата погодена од војната.
Според РТС, документот го потпишаа претседателот на Украина Володимир Зеленски и претставници на Албанија, Грција, Молдавија, Романија, Хрватска, Словенија, Северна Македонија, Црна Гора и Бугарија. Србија, претставена на самитот од претседателот Александар Вучиќ, според извештајот на РТС од Киев, беше единствената што не ја потпиша декларацијата.
Во тој документ, според РТС, Русија е обвинета за нелегална, неиспровоцирана и неоправдана агресија и повикува на итен прекин на војната и целосно, безусловно и проверливо повлекување на војската и воената опрема од целата територија на Украина.
Кога беше прашан каква реакција очекува во Србија и Русија, со оглед на тоа што неговата посета на Киев стана главна тема на разговор меѓу многу функционери во Москва и во Србија, Вучиќ истакна дека секогаш ги слуша сите забелешки.
„Исклучително е важно за мене и за сите други да разговараме за ова тука и за тоа какви се нашите политички ставови, а јас го правам ова за да ги заштитам српските национални интереси. Секако, секогаш ги слушам сите можни приговори што доаѓаат од целиот свет. Така функционира демократијата“, ја цитира РТС изјавата на Вучиќ.
На самитот во Киев, Вучиќ истакна пет важни работи за Србија поврзани со руско-украинскиот конфликт, а особено принципот на почитување на Повелбата на ОН и резолуциите на ОН во врска со поддршката за територијалниот интегритет и суверенитет на Украина. Тој, исто така, ја нагласи важноста на хуманитарната помош, обновата на украинските градови и поддршката за Украина на нејзиниот пат кон Европската Унија.
Вучиќ, исто така, рече дека со Зеленски разговарал за коридорите кон Ерменија, Азербејџан и Турција, оценувајќи дека ова би било „многу важно“ и дека може да се постигне напредок во оваа област за подобра поврзаност на овие земји.
„Ова бара многу инвестиции од Србија, Романија, Молдавија, Украина, но верувам дека можеме да сметаме на тоа во иднина“, заклучи Вучиќ.
