Србија и Азербејџан заеднички ќе градат гасна електрана со инсталиран капацитет од 500 мегавати, беше соопштено вчера за време на посетата на азербејџанскиот претседател Илхам Алиев на Белград. Тој најави „значајни“ инвестиции во Србија.
„Проектот за изградба на гасна електрана во Србија ќе биде една од најголемите инвестиции на Азербејџан во Европа“, рече Алиев на заедничката прес-конференција по разговорите со српскиот претседател Александар Вучиќ.
Алиев рече дека Азербејџан и Србија имаат „многу јасни планови“ за иднината, првенствено во областите на енергетиката и транспортот, со цел да се подобрат резултатите во тие два сектора.
Азербејџан неодамна започна со испораки на природен гас во Србија, која досега беше претежно зависна од снабдувањето со руски гас.
„Денес се согласивме да ги зголемиме количините за извоз, а овој гас ќе се претвори во електрична енергија. Така ќе имаме чиста енергија што е и за домашниот пазар, а во блиска иднина ќе се создадат можности за извоз за Србија“, истакна Алиев.
Вучиќ оцени дека гасна електрана со Азербејџан би можела да се отвори во близина на Ниш во 2029 година.
На вчерашните средби на двете државни делегации беа потпишани низа билатерални договори за понатамошно подобрување на економската соработка меѓу двете земји, а беше најавено и непосредно воспоставување директен лет меѓу Белград и азербејџанската престолнина Баку.
