Лоаклните избори во Косово за 38 градоначалници и советници во локалните собранија завршија вчера со излезност од 39,47 проценти, 17 општини ќе гласаат во вториот круг, а Српска листа прогласи победа во девет од 10 општини каде што имаше кандидати.
Од 38 општини во Косово, во 21 трката за градоначалник заврши вчера со гласање во првиот круг од локалните избори. Централната изборна комисија објави дека броењето на гласовите за општински советници ќе започне денес. Во четири општини со српско мнозинство на северот од Косово, Северна Митровица, Звечан, Лепосавиќ и Зубин Поток, победија кандидатите на Српската листа, најголемата српска партија во Косово, која има поддршка од властите во Белград.
Српската листа победи и во Нови Брдо, Штрпац, Грачаница, Ранилуг и Партес, а во 17 општини вториот круг од изборите ќе се одржи на 9 ноември. Во изборната трка учествуваа 32 политички партии, две коалиции, 32 граѓански иницијативи и 27 независни кандидати, од кои 12 беа српски партии и иницијативи.
Најсилната српска политичка опција поддржана од официјален Белград, Српската листа (СЛ), сестринска партија на владејачката Српска напредна партија, учествуваше на изборите откако ги бојкотираше претходните, со што им овозможи на градоначалниците Албанци, со излезност од нешто над 3,4 проценти од гласачите во северно Косово, да ја преземат и да ја држат власта во четири општини со српско мнозинство од мај 2023 година.
За време на кампањата, претставниците на Српската листа нагласија дека овие избори се „фатални за Србите во Косово и Метохија“ и дека Србите „мора да покажат единство и да ја поддржат Српската листа, со пенкало да ги заменат нелегитимните градоначалници Албанци“, да ги вратат четирите општини на север во свои раце и да ги потврдат победите во шесте општини во централниот дел на Косово јужно од Ибар, каде што Србите се мнозинство.
Претседателот на СЛ, Златан Елек, изјави дека партијата убедливо победила „во девет од 10 општини каде што Србите се мнозинство“. „Имаме двотретинско мнозинство во сите 10 општини. Најважно е што четирите општини северно од Ибар им се вратени на нашите луѓе“, цитираше радио-телевизија Елека од Србија.
Приштинскиот портал Koha објавува дека, според досега преброените гласови за градоначалници, Српската листа победила во сите општини со српско мнозинство и без втор круг, во Лепосавиќ, Нови Брдо, Штрпач, Зубин Поток, Звечан, Грачаница, Ранилуг, Партес, Клокот и Северна Митровица.
Судејќи според извештаите на приштинските медиуми, движењето Самоопределување на актуелниот премиер Албин Курти не ги забележа очекуваните резултати, освојувајќи градоначалнички места само во две општини.
