Студентите од Факултетот за инженерство и Медицинскиот факултет на Универзитетот во Нови Сад испратија порака за поддршка до граѓаните на Сараево по трагичната трамвајска несреќа што се случи на 12 февруари. Тие изразија сочувство до семејството и пријателите на младиот човек кој го загуби животот и им посакаа брзо закрепнување на повредените, пишува N1 Србија.
„Болката и гневот што ги чувствувате денес ни се добро познати. Нови Сад сè уште ја носи раната од падот на настрешницата“, рекоа студентите од Нови Сад. Тие истакнаа дека по трагедијата во нивниот град биле сведоци на познати шеми. Избегнување одговорност, одложување и употреба на сила наместо емпатија, преку притисок и интервенции кон студентите и граѓаните.
Тие им порачаа на граѓаните на Сараево: „Не сте сами“.
„Заедно сме во жалост, но и во барање вистина, одговорност и систем што ги штити животите, а не сопствениот мир. Со вас сме“, заклучија студентите од ФТН на Нови Сад и Медицинскиот факултет.
Во четвртокот се случи трамвајска несреќа во Сараево, во која почина 23-годишниот Ердоан Моранкиќ, додека неколку лица беа повредени. Меѓу нив беше и малолетна девојка на која ѝ беше ампутирана ногата.
Трагедијата предизвика протести на граѓаните кои бараат правда, а протестираа и возачите на трамвај. По несреќата, во јавноста се појавија информации за катастрофалната состојба на трамвајот и лошите услови во кои работат возачите и превезуваат патници.
Кантоналниот суд во Сараево го отфрли предлогот на Обвинителството на Сараевскиот кантон за одредување притвор за возачот на трамвајот Аднан Касаповиќ. Истиот ден, премиерот на Сараевскиот кантон, Нихад Ук, поднесе оставка, што ја собори и Владата на Сараевскиот кантон. Оставка поднесе и директорот на компанијата за јавен превоз на Сараево ГРАС, Сенад Мујагиќ.
